സ്ഫോടനം നടത്തിയ കാറിൽ ഉണ്ടായിരുന്ന ചാവേർ ഡോ. ഉമർ നബി തന്നെ ; സ്ഥിരീകരിച്ച് ഡിഎൻഎ റിപ്പോർട്ട്

സ്ഫോടന സ്ഥലത്ത് നിന്ന് കണ്ടെടുത്ത എല്ലുകളിൽ നിന്നും പല്ലുകളിൽ നിന്നും വേർതിരിച്ചെടുത്ത ഡിഎൻഎ സാമ്പിളുകളുമായി ഡോ. ഉമറിന്റെ അമ്മയുടെ ഡിഎൻഎ സാമ്പിളുകൾ ഒത്തുചേർന്നതിനെ തുടർന്നാണ് ഇപ്പോൾ ചാവേർ ഉമർ നബി തന്നെയാണെന്ന് സ്ഥിരീകരിച്ചിരിക്കുന്നത്. ഡോ. ഉമറിന്റെ അമ്മയിൽ നിന്ന് എടുത്ത ഡിഎൻഎ സാമ്പിളുകൾ കാറിൽ നിന്ന് കണ്ടെടുത്ത അവശിഷ്ടങ്ങളുമായി 100 ശതമാനം പൊരുത്തപ്പെട്ടതായി ഡിഎൻഎ റിപ്പോർട്ട് വ്യക്തമാക്കുന്നു.

സ്ഫോടനം നടക്കുമ്പോൾ വാഹനത്തിൽ ഡോ. ഉമർ നബി ഒറ്റയ്ക്കായിരുന്നുവെന്ന് അന്വേഷണ ഉദ്യോഗസ്ഥർ കണ്ടെത്തിയിട്ടുണ്ട്. ഫരീദാബാദിൽ സുരക്ഷാ ഏജൻസികൾ നേരത്തെ കണ്ടെത്തിയ ഭീകര സംഘത്തിലെ പ്രധാനിയായിരുന്നു കൊല്ലപ്പെട്ട ഡോ. ഉമർ നബി. പാകിസ്താൻ കേന്ദ്രീകരിച്ച് പ്രവർത്തിക്കുന്ന ഭീകര സംഘടനയായ ജെയ്‌ഷെ മുഹമ്മദുമായി ബന്ധപ്പെട്ടാണ് ഈ ഭീകരസംഘം പ്രവർത്തിച്ചിരുന്നത്. സ്ഫോടനവുമായി ബന്ധപ്പെട്ട കൂടുതൽ അന്വേഷണങ്ങൾ ദേശീയ അന്വേഷണ ഏജൻസി ഊർജ്ജിതമാക്കിയിട്ടുണ്ട്.