രക്തവും വെള്ളവും ഒരുമിച്ച് ഒഴുകില്ല! ഭീകരതയെ താലോലിക്കുന്ന പാകിസ്ഥാന് ഇനി വെള്ളമില്ല; സിന്ധു നദിയിൽ ഇന്ത്യ നിയന്ത്രണമുറപ്പിക്കുന്നു

1960-ൽ ഒപ്പുവെച്ച സിന്ധു നദീജല ഉടമ്പടിയെ മുൻനിർത്തി പാകിസ്ഥാൻ അന്താരാഷ്ട്ര തലത്തിൽ നടത്തുന്ന ആസൂത്രിതമായ നീക്കങ്ങൾക്കെതിരെ ഇന്ത്യ ശക്തമായ നിലപാട് സ്വീകരിച്ചിരിക്കുകയാണ്. പഹൽഗാം ഭീകരാക്രമണത്തിന്റെ പശ്ചാത്തലത്തിൽ, ഭീകരതയെ പ്രോത്സാഹിപ്പിക്കുന്ന അയൽരാജ്യത്തിന് വെള്ളം നൽകാനാവില്ലെന്ന കർശനമായ സന്ദേശമാണ് ഡൽഹി നൽകുന്നത്. ‘രക്തവും വെള്ളവും ഒരുമിച്ച് ഒഴുകില്ല’ എന്ന പ്രധാനമന്ത്രി നരേന്ദ്ര മോദിയുടെ പ്രഖ്യാപനം നടപ്പിലാക്കിക്കൊണ്ട് ഇന്ത്യ കരാർ താൽക്കാലികമായി നിർത്തിവെച്ചിരിക്കുകയാണ്.

2025-ൽ പഹൽഗാമിൽ നടന്ന ഭീകരാക്രമണം ഇന്ത്യയെ ഈ കടുത്ത തീരുമാനത്തിലേക്ക് നയിച്ച പ്രധാന ഘടകമാണ്. വിനോദസഞ്ചാരികളെ മതത്തിന്റെ അടിസ്ഥാനത്തിൽ വേർതിരിച്ച് വെടിവെച്ചുകൊന്ന ക്രൂരമായ സംഭവം പാകിസ്ഥാൻ സ്പോൺസർ ചെയ്യുന്ന ഭീകരതയുടെ ആഴം ഒരിക്കൽക്കൂടി വെളിപ്പെടുത്തി. ഈ സാഹചര്യത്തിൽ, ഒരു വശത്ത് ഭീകരത വളർത്തുകയും മറുവശത്ത് ഇന്ത്യയുടെ ജലസ്രോതസ്സുകൾ ഉപയോഗിച്ച് കൃഷിയും വൈദ്യുതിയും നടത്തുകയും ചെയ്യുന്ന പാകിസ്ഥാന്റെ ഇരട്ടത്താപ്പ് ഇനി അനുവദിക്കില്ലെന്ന് ഇന്ത്യ വ്യക്തമാക്കി.

പാകിസ്ഥാൻ ഭരണകൂടവും ആഗോള തിങ്ക് ടാങ്കുകളും മാധ്യമങ്ങളും ചേർന്ന് ഇന്ത്യയെ ഒരു ‘ജല അധിനിവേശ ശക്തി’യായി ചിത്രീകരിക്കാൻ വലിയ ശ്രമങ്ങളാണ് നടത്തുന്നത്. ചാത്തം ഹൗസ് പോലുള്ള അന്താരാഷ്ട്ര വേദികൾ ഉപയോഗിച്ച്, ഭീകരവാദത്തിൽ പാകിസ്ഥാന്റെ പങ്ക് മറച്ചുവെച്ചുകൊണ്ട് ഇന്ത്യ കരാർ ലംഘിക്കുന്നു എന്ന തരത്തിലുള്ള ആഖ്യാനങ്ങൾ കെട്ടിപ്പടുക്കാനാണ് പാകിസ്ഥാൻ ശ്രമിക്കുന്നത്. എന്നാൽ ഇത്തരം കുപ്രചാരണങ്ങൾ വസ്തുതകൾക്ക് നിരക്കാത്തതാണെന്ന് ഇന്ത്യ ചൂണ്ടിക്കാട്ടുന്നു.